Бұқар жырау ескерткіші Ботақара кентінде 2014 жылдың 19 қыркүйегінде ашылды. Бұқаржырау жұртшылығы ғана емес, исі қазақ елі үшін аса үлкен маңызды оқиға болды. Бұқар жырау ескерткішін республикалық конкурс жарияланып, 21 эскиздің ішінен ҚР көркем академиясының  мүшесі, мәдениет қайраткері, суретші-мүсінші Бейбіт Мұстафиннің жұмысы таңдап алынды. Автордың айтуынша осы ескерткішті сомдау үшін екі ай бойы кітапханаларда отырып, Бұқар баба туралы ғылыми деректермен  танысқан.

Баба мүсінінде оның ұлылығы, даралығы, даналығы бірден көзге түседі, еріксіз бас идіртеді. Қолындағы таспиығы оның аузынан Алласы түспеген жан екенін аңғартса керек. Ескерткіштің биіктігі 8 метр 40 см, салмағы 16 тонна.

    Ашылу салтанатына облыс әкімі Нұрмұхамбет Әбдібеков, аудан әкімі Нұркен Қобжанов, жыршы Алмас Алматов, әнші, қоғам қайраткері Бекболат Тілеухан, ескерткіш авторы, архитектор Бейбіт Мұстафин, Бұқар баба ұрпағы Ғалымтай Бахтиярұлы қатысты. Ашу құрметі облыс әкімі Нұрмұхамбет Әбдібеков пен жыршы Алмас Алматовқа бұйырды. Ашылудан кейін жыршы Алмас Алматовтың бастамасымен аудандық өнер мектебінде жыршы-жыраулар сыныбы ашылды. Одан соң шара мәдениет үйінде жалғасып, «Бұқар жырау –бақ мекенім» атты деректі фильмнің   

/авторлары: Ботабек Маратұлы, Майгүл Асқарова/ тұсаукесері жасалып, баба рухына дұға бағышталды.

    Айтбай Жұмағұлов, Балғынбек Имашев, Серікзат Дүйсенғазин, Жансая Мусина, Дидар Қамиев, Мейірбек Сұлтанхандардың қатысуымен ақындар айтысы ұйымдастырылды. Жүргізушілер Майгүл Асқарова мен ақын Қалқаман Сарин.